தமிழ்நாடு திட்டக்குழு ஆணைய உறுப்பினர் டாக்டர் கு. சிவராமன் தலைமையில் சித்த மருத்துவம் எதிர்கொள்ளும் சவால்கள் மற்றும் தேவைகள் பற்றிய கலந்துரையாடல்

சிறந்த பேச்சாளரும், மரபு சார் உணவு ஆராய்ச்சியாளரும், எழுத்தாளரும், சித்த மருத்துவரும், ஆரோக்கியா சித்த மருத்துவமனை தலைவரும், தமிழ்நாடு திட்டக்குழு ஆணைய உறுப்பினருமான மரு. கு. சிவராமன் அவர்களை தெரியாதவர்கள் தெரியாதவர்கள் யாரும் இருக்க முடியாது.
பொதுமக்களால் கொண்டாடப்படும் அவர் ஒரு பேச்சாளராக மட்டுமே அறிந்து கொள்ளப்பட்டவர். ஆனால் அதையும் தாண்டி மிகச்சிறந்த நிர்வாக திறன் உடையவர் என்பது அவரின் பன்முகத் தன்மைக்கு உதாரணமாகும்.

22.08.2024 சேப்பாக்கத்தில் அமைந்துள்ள எழிலகத்தில் நடைபெற்ற சித்த மருத்துவ வளர்ச்சிக்கான சவால்கள் மற்றும் அதனை எதிர்கொள்ளும் முறைகள் பற்றிய கூட்டரங்கு நடைபெற்றது. தனியார் சித்த மருத்துவமனைகள் சார்பாக டாக்டர் ஜெ.ஜெயவெங்கடேஷ், பேராசிரியர் டாக்டர் பா. செந்தில் குமாரும் கலந்து கொண்டோம். மேலும் தமிழ்நாடு அரசு மருத்துவர்கள், மருந்து செய் நிலையங்கள் சார்பாக டாக்டர் சிவகுமார், டாக்டர் வெற்றிவேந்தன், இம்ப்காப்ஸ் சார்பாக அதன் தலைவர் டாக்டர் கண்ணன், சித்த மருத்துவ பேரியக்கம் சார்பாக டாக்டர் விஜய் விக்ரமன், அரசு சித்த மருத்துவ அலுவலர் சங்கம் சார்பாக டாக்டர் சங்கர்ராஜ், டாக்டர் தமிழ்க்கனி, அபாஃக் போலி மருத்துவர்கள் ஒழிப்பு குழுமம் சார்பாக டாக்டர் ஸ்ரீமுக நாகலிங்கம் ஆகியோர் கலந்து கொண்டனர்.

மாநிலத் திட்ட குழுவின் செயல்பாடும், உறுப்பினராக தனது பணியின் எல்லையை பற்றியும் மிகச்சிறப்பாக டாக்டர் சிவராமன் அவர்கள் விளக்கினார். வேலையில்லா திண்டாட்டம், ஆள் பற்றாக்குறை, குறைவான சம்பளம், கூடுதல் பணி நேரம், அடிப்படை வசதிகள் இல்லாத பணியிடம், பதவி உயர்வில் காலதாமகம் ஆகிய பிரச்சினைகள் சித்த மருத்துவத் துறையில் மட்டும் அல்லாமல் பல்வேறு துறைகளிலும் இருப்பதை முதலிலேயே சுட்டிக்காட்டினார். ஆகவே ஒவ்வொரு குறைகளாக உறுப்பினர்களின் ஆலோசனையை கேட்டறிந்தார்.

மிக சிறந்த முறையில் ஆரோக்கியமாக விவாதம் நடத்தப்பட்டது. சித்த மருத்துவமனைகள் மற்றும் கிளினிக் சங்கம் சார்பாக கீழ்க்கண்ட குறைகள் சுட்டிக்காட்டப்பட்டன.

1. தமிழ்நாடு சித்த மருத்துவ கவுன்சில் செயல்படாமல் இருப்பது
2. பழனி சித்த மருத்துவக் கல்லூரி செயல்படாமல் இருப்பது
3. ஆரம்ப சுகாதார நிலையம், தாலுக்கா சுகாதார நிலையம், மாவட்ட அரசு மருத்துவமனை மற்றும் சித்த மருத்துவக் கல்லூரி மருத்துவமனை ஆகிய அனைத்து இடங்களுக்கும் ஒரே மாதிரியான மருந்துகளே வழங்கப்படுவது
4. அடிப்படை வசதிகள் இல்லாமல் இயங்கும் சென்னை மற்றும் பாளையங்கோட்டை சித்த மருத்துவக் கல்லூரி
5. இன்றோஅன்றோ இடிந்து போகும் நிலையில் இருக்கும் இந்திய மருத்துவத்துறை இயக்குனர் அலுவலக கட்டிடம்
6. எம் எஸ் எம் இ தொழில் பிரிவின் சித்த மருத்துவம் சேர்க்கப்படாமல் இருப்பது
7. DIC மற்றும் TIIC தொழில் கடன் திட்டங்களில் பி.எஸ்.எம்.எஸ் படிப்பை சேர்க்காதது
8. தமிழகத்தை தவிர்த்து பிற இடங்களில் ஆல் இந்தியா இன்ஸ்டியூட் ஆப் சித்தா மெடிசன் மையம் அமைப்பது
9. பிரிஸ்கிரிப்சன் ஆடிட் நடத்தி அதன் மூலம் தேவையான மருந்துகளை மட்டும் கூடுதலான அளவில் அரசு சித்த மருத்துவமனைகளுக்கு வழங்குவது
10. மாவட்ட மருத்துவ கண்காணிப்பு மற்றும் ஆய்வு குழுவில் கண்டிப்பாக இரண்டு சித்த மருத்துவர்களை உறுப்பினராக சேர்ப்பது
11. இந்திய மருத்துவத்துறை இயக்குனர் அலுவலகத்தில் அரசு பணிகள் மற்றும் மருத்துவ கல்வி என இரண்டு இணை இயக்குனர்களை நியமிப்பது
12. மாநகராட்சிகள் மற்றும் கோயில்களில் சித்த மருத்துவமனைகள் அமைப்பது
13. சித்த மருத்துவமனைகளில் புற மருத்துவ சேவையை விரிவுபடுத்துவது
14. ஒவ்வொரு மாவட்டத்திற்கும் தனித்தனியாக மாவட்ட சித்த மருத்துவ அலுவலரை நியமிப்பது
15. MRB மூலமாக சித்தா டிரக் இன்ஸ்பெக்டர் பதவியை புதிதாக தோற்றுவிப்பது
16. மான் கொம்பு, ஆமையோடு, செஞ்சந்தனம் ஆகிவற்றை முறைப்படி மருந்து தயாரிக்க வழங்குவது
17. சித்தா கிளஸ்டர் அமைப்பது
18. ஐந்திணை மூலிகை பண்ணை அமைப்பது
19. ராமேஸ்வரத்தில் சித்தா ஹெரிடேஜ் சென்டர் அமைக்க இடம் ஒதுக்கி தர வேண்டுவது
20. கன்னியாகுமரியில் உயர்தர வர்ம மருத்துவ ஆராய்ச்சி மையம் அமைக்க இடம் ஒதுக்கி தர வேண்டுவது
21. காஞ்சிபுரத்தில் அறிஞர் அண்ணா சித்த மருத்துவ உயர் தர புற்றுநோய் மையம் அமைப்பது ஆகிய கோரிக்கைகள் வைக்கப்பட்டன

ஒவ்வொரு கோரிக்கைக்கும் அதன் தேவை, அதனை ஏற்படுத்துவதற்காக அரசுக்கு ஏற்படும் செலவு ஆகியவற்றை அப்பொழுதே கணித்து இது சம்பந்தமாக எப்படி திட்ட அறிக்கையை தயார் செய்து அனுப்ப வேண்டும் என்பதை உடனே உடனே குழுவினரிடம் மிகச் சிறப்பாக ஆலோசனை செய்தது டாக்டர் கு சிவராமனின் நிர்வாக திறமை பற்றிய மற்றொரு பக்கத்தை எடுத்துக்காட்டியது. ‌ஒருவர் இவ்வளவு பன்முகத் தன்மையுடன் இயங்க முடியுமா என்ற ஆச்சரியத்தையும், அவ்வாறு இயங்குபவர் நமது சித்த மருத்துவர் என்ற பெருமையையும் ஏற்படுத்தியது. டாக்டர் சிவராமன் அவர்களின் ஆலோசனைப்படி அயராமல் பணிகளை தொடருவோம்

சித்த மருத்துவமனைகள் மற்றும் கிளினிக் சங்கம், மதுரை